Тошкентда тунда қўлида пичоқ билан юрган эркак қамалди
У кўп қаватли уйларнинг бирида қўшнисининг хонадони эшигини тақиллатиб, уни безовта қилган.
Тошкент шаҳрида жамоат тартибини бузган шахс ички ишлар органлари ходимлари томонидан тезкорлик билан аниқланиб, маъмурий тартибда ушланган. Бу ҳақда пойтахт ИИББ матбуот хизмати маълум қилди.
Қайд этилишича, 5 январ куни соат 01:35 атрофида 1984 йилда туғилган фуқаро O.С. маст ҳолатда Яшнобод туманидаги кўп қаватли уйларнинг бирида қўшниси Д.Й.нинг хонадони эшигини тақиллатиб, безовта қилган. У умумий фойдаланишдаги йўлакда бўлган ҳолда совуқ қурол сифатида фойдаланилиши мумкин бўлган ашёни қонунга хилоф равишда олиб юрган ва жамоат тартибини бузган.
Мазкур ҳолат акс этган видео ижтимоий тармоқларда тарқалиб, жамоатчиликда хавотир уйғотган. Хабар келиб тушиши билан туман ички ишлар органлари ходимлари томонидан тезкор чоралар кўрилиб, ҳуқуқбузар маъмурий тартибда ушланди.
Ҳолат юзасидан Яшнобод тумани ИИО ФМБ томонидан фуқаро O.С.гa нисбатан Маъмурий жавобгарлик тўғрисидаги кодекснинг 183-моддаси (майда безорилик), 185-2-моддаси (совуқ қуролни ёки совуқ қурол сифатида фойдаланилиши мумкин бўлган ашёларни олиб юриш) ҳамда 194-моддаси (ички ишлар органлари ходимларининг қонуний талабларини бажармаслик) билан маъмурий баённомалар расмийлаштирилди.
Тўпланган ҳужжатлар жиноят ишлари бўйича Яшнобод тумани судига юборилди. Суд қарори билан ҳуқуқбузарга нисбатан маъмурий қамоқ жазоси тайинланди.
