Oq uy maʼlumotiga ko‘ra, AQSH prezidenti Donald Tramp tomonidan bildirilgan ogohlantirishlardan so‘ng Eron tomonidan rejalashtirilgan 800 ta qatl bekor qilingan. Bu haqda rbc.ru xabar berdi.
Oq uy matbuot kotibi Kerolin Livitt matbuot anjumanida Prezident va uning jamoasi Eron rasmiylarini namoyishchilarni o‘ldirish jiddiy oqibatlarga olib kelishi mumkinligi haqida ogohlantirganini maʼlum qildi. Shundan so‘ng AQSH prezidenti qatllar va zo‘ravonliklar to‘xtatilgani haqidagi xabarni olgan.
Qayd etilishicha, Eron tomoni ushbu qatllar bo‘yicha rasmiy bayonot eʼlon qilmagan. Oq uy esa vaziyatni diqqat bilan kuzatishda davom etayotganini va barcha ehtimoliy choralar ochiqligicha qolayotganini bildirgan.
Kerolin Livittning taʼkidlashicha, agar mintaqada barqarorlikni tiklash maqsad qilinsa, bu boradagi harakatlarni cho‘zmasdan amalga oshirish zarur. Uning so‘zlariga ko‘ra, jarayonni bir necha oyga kechiktirish taʼsirni sezilarli darajada kamaytirishi mumkin.
Avvalroq Reuters agentligi norozilik namoyishlarini bostirish jarayonida xavfsizlik kuchlari ishtirokida taxminan 2600 kishi halok bo‘lganini xabar qilgan edi. Eron davlat televideniyesi esa AQSH prezidentining tahdidlariga qaramay, rasmiy Tehron pozitsiyasi o‘zgarmaganini maʼlum qilgan.
So‘nggi keskinlik fonida Eron profilaktik zarba berishga tayyor ekanini eʼlon qilgan. Shundan so‘ng Pentagon Qatardagi AQSHning Yaqin Sharqdagi asosiy harbiy bazasida xizmat qilayotgan xodimlarga evakuatsiya bo‘yicha tavsiyalar bergan.