Sammit Ozarbayjon Respublikasi Prezidenti Janobi Oliylari Ilhom Aliyev raisligida o‘tkazildi. Tadbirda Qozog‘iston Respublikasi Prezidenti Janobi Oliylari Qosim-Jomart To‘qayev, Qirg‘iz Respublikasi Prezidenti Janobi Oliylari Sadir Japarov, Turkiya Respublikasi Prezidenti Janobi Oliylari Rejep Tayyip Erdog‘an, O‘zbekiston Respublikasi Prezidenti Janobi Oliylari Shavkat Mirziyoyev, Turkmaniston Xalq Maslahati Raisi Janobi Oliylari Gurbanguli Berdimuhamedov hamda Vengriya Bosh vaziri Viktor Orban ishtirok etdilar.
Turkiy hamkorlik tashkilotlari rahbarlari ham sammitda qatnashdilar: Turkiy madaniyat va meros jamg‘armasi prezidenti Aqtoti Rayimqulova, Turkiy davlatlar tashkiloti bosh kotibi Kubanychbek Omuraliev, TURKSOY bosh kotibi Sulton Raev, TURKPA bosh kotibi Mehmet Sürayya Er, TDT oqsoqollar kengashi raisi Binali Yildirim, Turkiy akademiya prezidenti Shoxin Mustafayev, Turkiy investitsiya jamg‘armasi prezidenti Bag‘dod Amreyev, Turkiy savdo-sanoat palatalari ittifoqi prezidenti Mammad Musayev hamda hukumat vakillari ishtirok etdilar.
Sammit yakunida Turkiy davlatlar tashkilotining 12-sammit deklaratsiyasi imzolandi. Ushbu hujjat turkiy dunyo birligini mustahkamlash, madaniy hamkorlikni rivojlantirish va umumiy kelajak uchun strategik istiqbolni shakllantirishga qaratilgan.
Sammit yakunlariga ko‘ra, tarixiy qaror qabul qilindi — Turkmaniston Turkiy madaniyat va meros jamg‘armasiga kuzatuvchi davlat sifatida qo‘shildi.
Mazkur sammit turkiy davlatlar o‘rtasida o‘zaro hamkorlik, fikr almashish va sheriklik aloqalarini yanada chuqurlashtirish uchun muhim maydon bo‘lib xizmat qildi.