Turkiya hududida qo‘lga olingan uch nafar O‘zbekiston fuqarosi mamlakatga ekstraditsiya qilindi.
O‘zbekistonning Istanbuldagi Bosh konsulligi ma’lumotiga ko‘ra, ikki davlat ichki ishlar vazirliklarining hamkorligida o‘tkazilgan tergov va tezkor tadbirlar natijasida qidiruvda bo‘lgan shaxslar hibsga olingan.
Qayd etilishicha, firibgarlikda gumonlangan ayol shaxs qo‘lga olinib, belgilangan tartibda O‘zbekistonga deportatsiya qilingan. Shuningdek, soliq va yig‘imlarni to‘lashdan bo‘yin tovlaganlik hamda bojxona qoidalarini buzganlikda ayblangan yana ikki fuqaro ham hibsga olinib, O‘zbekiston tergov organlariga topshirilgan.
Eslatib o‘tamiz, bundan avval ham Turkiya hukumati odam savdosida gumon qilingan ikki nafar ayolni qo‘lga olib, O‘zbekistonga deportatsiya qilgan edi. Mazkur chora ikki davlat huquqni muhofaza qiluvchi organlari o‘rtasidagi hamkorlik doirasida amalga oshirilgan.