Хитойда лицензиясиз интервью ва янгиликлар нашр этиш тақиқланади

 

Пекин шаҳрининг Кибермакон маъмурияти 2025 йил декабрь ойида онлайн янгиликларни назорат қилиш бўйича бир ойлик махсус кампанияни бошлади. Ушбу тадбир қонунбузарликларнинг олдини олиш, етакчи оммавий ахборот воситаларининг таъсирини кучайтириш ва соғлом интернет муҳитини яратиш мақсадида амалга оширилмоқда, деб хабар берди Хитой Марказий Телевидениеси (CCTV).

 

Кампания доирасида ноқонуний онлайн ахборот фаолияти қатъий назоратга олинади. Хусусан, лицензиясиз интервьюлар, янгиликларни тўплаш, таҳрирлаш ва нашр этиш, маълумотларни бузиб ёки контекстдан чиқариб кўрсатиш тақиқланди. Шу билан бирга, жамоатчиликни чалғитувчи аккаунтлар, фотосуратлар ва номлардан фойдаланиш ҳам кузатилади.

 

Расмий баёнотга кўра, ушбу чора-тадбирлар интернетдаги салбий кайфият, ваҳима тарқалиши, фитна назариялари ва сохта расмий баёнотлар тарқалишини олдини олишга қаратилган. Кампания “Тоза пойтахт – тоза манбалар, ҳақиқий овоз” шиори остида ўтказилмоқда ва барча ноқонуний фаолиятларни аниқлаш ҳамда бартараф этиш бўйича чораларни ўз ичига олади.

 

Хитой расмийлари июль ойида вояга етмаганлар учун онлайн муҳитни ҳимоя қилиш кампаниясини бошлаганини ҳам эслатди. Аввалроқ эса интернетдаги ахборот назорати ва киберҳужумлардаги ҳақоратли сўзлар устидан мониторинг кучайтирилган эди.