АҚШ ва Эрон музокаралари 6 ой давом этиши мумкин — Bloomberg
Айрим расмийлар можарони сиёсий йўл билан ҳал этиш ва якуний келишувга эришиш учун қўшимча вақт зарур, деб ҳисобламоқда.
Bloomberg агентлиги хабарига кўра, Форс кўрфази ва Европадаги айрим етакчилар АҚШ ҳамда Эрон ўртасидаги эҳтимолий тинчлик келишуви бўйича музокаралар олти ойгача давом этиши мумкинлигини тахмин қилмоқда.
Манбаларга кўра, айрим расмийлар можарони сиёсий йўл билан ҳал этиш ва якуний келишувга эришиш учун қўшимча вақт зарур, деб ҳисобламоқда. Шу боис, музокаралар жараёнини муваффақиятли якунлаш мақсадида амалдаги сулҳ муддатини узайтириш таклиф қилинмоқда.
Қайд этилишича, минтақа давлатлари, шунингдек, глобал бозорлар барқарорлигини таъминлаш мақсадида Ҳормуз бўғозидаги чекловлар тез орада бекор қилинишидан манфаатдор. Таҳлилчиларга кўра, май ойигача вазият барқарорлашмаса, энергия нархларининг ошиши ва озиқ-овқат бозорларида босим кучайиши мумкин.
Хабарда айтилишича, эҳтимолий тинчлик битими доирасида Эроннинг уранни бойитиш дастури ҳамда узоқ масофали баллистик ракета салоҳияти бўйича чекловлар муҳокама қилиниши мумкин.
Шу билан бирга, Форс кўрфази мамлакатлари раҳбарлари ҳарбий ҳаракатларнинг қайта бошланишини истамаслиги ва Теҳрон билан музокаралар давом эттирилишини қўллаб-қувватлаётгани таъкидланмоқда.
