IDF Ҳизбуллоҳ қуролсизлантирилмагунча Ливандаги операцияларни давом эттиради
Ливан армияси Исроилни сулҳ битимини бузишда айблади.
Исроил мудофаа кучлари (IDF) Ҳизбуллоҳ тўлиқ қуролсизлантирилмагунга қадар Ливан жанубидаги ҳарбий операцияларни давом эттириш ниятида эканини маълум қилди.
Мудофаа вазири Исраэл Катзнинг баёнотига кўра, ИДФ томонидан назоратга олинган ҳудудлар сақлаб қолинади ва бундан кейин ҳам ушлаб турилади. Унинг таъкидлашича, Исроилнинг асосий мақсади Ҳизбуллоҳни ҳарбий ёки сиёсий йўллар билан қуролсизлантиришдан иборат.
Шунингдек, Катз хавфсизлик зонаси ва Литани дарёси оралиғидаги ҳудуд ҳали ҳам қуролли гуруҳлар ва ҳарбий техникадан тўлиқ тозаланмаганини билдирган. Унга кўра, ушбу мақсадга сиёсий музокаралар орқали ёки сулҳ муддати тугаганидан сўнг ҳарбий амалиётларни давом эттириш орқали эришилиши мумкин.
Айни пайтда Ливан армияси Исроилни сулҳ битимини бузишда айблаб, мамлакат жанубидаги Хиём шаҳрига зарба берилганини маълум қилди.
Аввалроқ АҚШ президенти Доналд Трамп Исроил ва Ливан расмийлари ўртасида ўн кунлик сулҳ бўйича келишувга эришилганини билдирган эди.
