Россияда Путиннинг рейтинги кетма-кет олтинчи ҳафта пасаймоқда
Россия етакчисига бўлган ишонч даражаси 1,8 фоизга пасайиб, 72 фоизга тушган.
Бутунроссия жамоатчилик фикрини ўрганиш маркази президент Владимир Путин фаолиятини маъқуллаш даражаси кетма-кет олтинчи ҳафта пасаяётганини қайд этди.
Марказ маълумотларига кўра, 6–12 апрель кунлари ушбу кўрсаткич 66,7 фоизни ташкил этиб, бир ҳафта ичида 1,1 фоизга камайган. Шу билан бирга, Путинга бўлган ишонч даражаси ҳам 1,8 фоизга пасайиб, 72 фоизга тушган.
Шунингдек, ҳукмрон “Ягона Россия” партиясининг қўллаб-қувватлаш даражаси 27,3 фоизгача камайган (–2,4 фоиз пункт). Айни пайтда Давлат Думасида вакилликка эга бошқа сиёсий кучлар рейтинги ўсиш динамикасини кўрсатмоқда.
Хусусан, “Янги одамлар” партияси 12,4 фоиз (+0,1 фоиз), Коммунистик партия (КПРФ) 10,9 фоиз (+0,6 фоиз), Либерал-демократик партия (ЛДПР) 10,8 фоиз (+0,3 фоиз), “Адолатли Россия” эса 5,2 фоиз (+0,3 фоиз) даражасида баҳоланган.
Бошқа бир социологик марказ — Public Opinion Foundation март ойида президент рейтинги пасайганини қайд этган бўлса, апрель ойида аксинча ўсиш кузатилганини маълум қилган. 17 апрель куни эълон қилинган ҳисоботга кўра, респондентларнинг 76 фоизи Путин фаолиятини ижобий баҳолаган (29 мартда — 74 фоиз).
Қайд этилишича, сўнгги ҳафталарда ҳар икки марказ сиёсий рейтингларни аввалгига нисбатан кечроқ эълон қилмоқда.
Мутахассислар Россияда Telegram мессенжерининг блокланиши ва айрим ҳудудларда мобил интернет чекловлари рейтинг пасайишига сабаб бўлиши мумкинлигини билдирган. Шунингдек, нархларнинг ошиши ва урушнинг салбий таъсири ҳам асосий омиллар қаторига киради.
