Россияда портлаш оқибатида бир нафар ўзбекистонлик ҳалок бўлди
Портлаш чиқинди контейнерларини юклаш вақтида содир бўлган.
Россиянинг Владикавказ шаҳрида чиқинди контейнерларини юклаш вақтида содир бўлган портлаш оқибатида бир киши ҳалок бўлди. Бу ҳақда ТАСС хабар бермоқда.
Шимолий Осетия раҳбари Сергей Меняйло маълум қилишича, ҳодиса 17 апрель куни эрталаб Интернатсионалная кўчаси ва Партизанский тор кўчаси кесишган ҳудудда юз берган. Портлаш вақтида ҳудудни тозалаш ишларини олиб бораётган коммунал хизмат ходими воқеа жойида вафот этган.
Маълум бўлишича, ҳалок бўлган шахс Ўзбекистон фуқароси бўлиб, унинг беш нафар фарзанди бор.
Ҳодиса жойида фавқулодда хизматлар ва ҳуқуқни муҳофаза қилувчи органлар иш олиб бормоқда. Прокуратура томонидан текширув бошланган, тергов органлари ҳам воқеа юзасидан суриштирув ўтказмоқда.
Дастлабки маълумотларга кўра, портлашга чиқинди контейнери ичида бўлган портловчи буюмлар сабаб бўлган. Ҳолат юзасидан Россия Жиноят кодексининг 109-моддаси (эҳтиётсизлик оқибатида ўлимга сабаб бўлиш) билан жиноят иши қўзғатилган.
