Xitoyning sobiq qishloq xo‘jaligi vaziri Tan Chjentszyan poraxo‘rlikda ayblanib, ikki yil muddatga ijro etilishi belgilangan o‘lim jazosiga hukm qilindi.
Sinxua agentligining xabar berishicha, mazkur hukm Xitoyning Jilin provinsiyasi, Chanchun shahri xalq sudi tomonidan chiqarilgan.
Sud qaroriga ko‘ra, sobiq amaldor umrbod siyosiy huquqlaridan mahrum qilinadi. Shuningdek, uning shaxsiy mulklari va noqonuniy yo‘l bilan topilgan daromadlari davlat foydasiga musodara etiladi.
Tergov ma’lumotlariga ko‘ra, Tan Chjentszyan 2007–2024-yillar davomida markaziy va mahalliy darajadagi turli lavozimlarda ishlagan davrida tijorat operatsiyalari, shartnomalar va kadrlar siyosati bo‘yicha manfaatdor tomonlarga yordam ko‘rsatish evaziga 268 million yuandan (taxminan 38 million AQSh dollari) ortiq pora olgan.