Qozog‘istonning Olmaota viloyati hokimining birinchi o‘rinbosari Qanat Yesbolatovning “Xudo ularni allaqachon jazolagan” degan iborasi ijtimoiy tarmoqlarda keng muhokamaga sabab bo‘ldi. “Nur.kz”ning yozishicha, hodisa Sog‘liqni saqlash vaziri bilan uchrashuv chog‘ida yuz bergan va ko‘plab fuqarolar bu so‘zlarni nogironligi bor shaxslarga nisbatan haqorat sifatida qabul qilgan.
Ijtimoiy tarmoq foydalanuvchilari amaldor bayonotini inson qadri va davlat xizmatchisi etikasiga zid deb baholadi hamda tekshiruv o‘tkazish, hatto iste’fo masalasini ko‘rib chiqishni talab qilishdi. Biroq ayrimlar Yesbolatovning so‘zlari noto‘g‘ri tushunilganini, u aslida ularning og‘ir ahvoliga hamdardlik bildirmoqchi bo‘lganini ta’kidladi.
Mansabdor voqea yuzasidan rasmiy izoh berib, iborani noto‘g‘ri ifodalaganini tan oldi. U aslida “Xudo ularga katta sinov bergan” demoqchi bo‘lganini aytib, jamoatchilikdan uzr so‘radi. Yesbolatovning qayd etishicha, uchrashuv davomida tartib buzilgani uchun vaziyat noqulay tus olgan, biroq keksalar va nogironligi bo‘lgan shaxslarga doimo birinchi navbat berilishi kerak.