Ijtimoiy tarmoqlarda Yangi yil bayrami munosabati bilan qo‘shimcha dam olish kunlari berilmasligi haqida turli xabarlar tarqalmoqda.
Kambag‘allikni qisqartirish va bandlik vazirligining bildirishicha, Yangi yil bayrami arafasida qo‘shimcha ishlanmaydigan kunlarni belgilash hamda dam olish kunlarini ko‘chirish bo‘yicha takliflar kiritilgan.
Xususan, takliflarda 2025-yil 31-dekabr hamda 2026-yil 2 va 3-yanvar kunlarini qo‘shimcha dam olish kunlari etib belgilash nazarda tutilgan.
Xushnudbek Xudoyberdiyevning ma'lum qilishicha, O‘zbekistonda Yangi yil bayrami munosabati bilan ketma-ket besh kun dam olish kuni belgilanishi kutilmoqda.
Prezident qarori loyihasiga muvofiq, 2025-yil 31-dekabrdan 2026-yil 4-yanvarga qadar bo‘lgan davr dam olish kunlari sifatida belgilanishi rejalashtirilgan. Shu tariqa, bayram munosabati bilan fuqarolar uchun qo‘shimcha dam olish imkoniyati yaratiladi.
Mazkur qaror loyihasi hozirda ko‘rib chiqilmoqda va yaqin kunlarda tasdiqlanishi kutilmoqda. Hujjat Prezident tomonidan imzolangach, rasmiy ravishda e’lon qilinadi.