Yaponiyaning Ayi viloyatiga qarashli Toyoake shahri aholining yuzma-yuz muloqotini kuchaytirish va sog‘lom turmush tarzini targ‘ib etish maqsadida raqamli qurilmalardan foydalanish vaqtini cheklovchi tavsiyani qabul qildi. Bu haqda Time portali xabar bermoqda.
Mahalliy kengash tomonidan qabul qilingan hujjatga ko‘ra, aholi ish yoki o‘qishdan tashqari vaqtda smartfon, planshet va noutbuklardan kuniga ikki soatdan ortiq foydalanmaslikka chaqirilmoqda. Tavsiya majburiy emas va jarima yoki huquqiy sanksiyalarni nazarda tutmaydi — u o‘zini o‘zi nazorat qilish va sog‘lom hayot tarzini rag‘batlantirishga qaratilgan.
Tashabbus shahar meri Masafumi Kouki tomonidan ilgari surilgan bo‘lib, u raqamli ekranlarning insonlararo aloqa va uyqu sifatiga salbiy ta’siri ortayotganini ta’kidlagan. Merning so‘zlariga ko‘ra, “hatto poyezdda yoki jamoat joylarida ham odamlar bir-biri bilan emas, telefonlari bilan ‘suhbatlashmoqda’”.
Tadqiqotlarga ko‘ra, uxlashdan oldin ekran qarshisida uzoq vaqt o‘tirish melatonin ishlab chiqarilishini kamaytiradi, bu esa uyquning sifatiga, ish unumdorligiga va ruhiy holatga salbiy ta’sir ko‘rsatadi. Shuningdek, kengash ijtimoiy tarmoqlarga qaramlik bilan bog‘liq tashvish va izolyatsiya holatlarini kamaytirishni ham maqsad qilgan.
Tavsiya boshlang‘ich sinf o‘quvchilari uchun soat 21:00 dan, o‘rta va yuqori sinflar uchun esa soat 22:00 dan keyin telefonlardan foydalanmaslikni tavsiya etadi. Qaror 12 ovoz bilan yoqlab, 7 ovoz bilan qarshi qabul qilingan.
Aholi bu tashabbusni turlicha qabul qildi: ayrimlar uni sog‘lom muloqot va uyqu uchun foydali deb bilsa, boshqalar bu cheklovni “ortiqcha va amaliy emas” deb hisoblamoqda. Shunga qaramay, mer Kouki tavsiya mavzuni muhokama maydoniga olib chiqgani o‘ziyoq ijobiy o‘zgarishning boshlanishi ekanini ta’kidlagan.
Mutaxassislar bu tashabbusni ta’limiy dasturlar, psixologik qo‘llab-quvvatlash va oilaviy muloqotni mustahkamlash bilan uyg‘unlashtirishni taklif etmoqda. Toyoake shahri hozircha bu qaror qanday natija berishini kuzatmoqda — u raqamli hayot va real muloqot o‘rtasida muvozanat topishga urinish sifatida baholanmoqda.