Yaponiyaning markaziy qismida joylashgan Toeake shahri aholiga kuniga ikki soatdan ortiq smartfondan foydalanmaslikni tavsiya qiluvchi tashabbus bilan chiqdi. Mazkur loyiha jarima yoki majburiy sanksiyalarni nazarda tutmaydi. U raqamli giyohvandlik va uning salomatlikka ta’sirini kamaytirishga qaratilgan, deb yozadi moya-planeta.ru.
Bolalar va oilalar agentligi tomonidan o‘tkazilgan so‘rov natijalariga ko‘ra, yoshlar ish kunlarida internetda besh soatdan ortiq vaqt sarflaydi. Shu sababli ikki soatlik chegarani tavsiya etish tashabbusi ilgari surildi. Cheklov uyqu, diqqatni jamlash va ruhiy salomatlik bilan bog‘liq muammolarning oldini olishni maqsad qilgan.
Loyiha doirasida boshlang‘ich sinf o‘quvchilari uchun qo‘shimcha “komendantlik soati” ham taklif etilgan: soat 21:00 dan keyin, o‘rta va yuqori sinf o‘quvchilari uchun esa 22:00 dan keyin smartfonlardan foydalanmaslik tavsiya qilinadi.
Toeake meri Masafumi Koki mazkur cheklovlar majburiy emasligini, ammo smartfonlardan ortiqcha foydalanish salbiy oqibatlarga olib kelishini ta’kidladi. Yakuniy qaror kelasi hafta qabul qilinadi va agar loyiha tasdiqlansa, oktabr oyidan kuchga kiradi.
Biroq tashabbus ijtimoiy tarmoqlarda bahs-munozaralarga sabab bo‘ldi. Ba’zi foydalanuvchilar ikki soatlik cheklovni haqiqatdan uzoq, film tomosha qilish yoki kitob o‘qish uchun ham yetarli emas deb hisoblamoqda. Boshqalar esa bunday qarorlar davlat emas, balki oilalarning ixtiyorida bo‘lishi kerakligini ta’kidlamoqda.
Yaponiyada ilgari ham shunga o‘xshash tajribalar kuzatilgan. Xususan, 2020-yilda Kagava prefekturasi bolalar o‘yin vaqtini ish kunlarida kuniga bir soat, ta’til davrida esa 90 daqiqadan oshirmaslikni tavsiya qilgan edi.