Жанубий Кореядаги заводда бахтсиз ҳодиса сабаб Ўзбекистон фуқароси ҳалок бўлди
Ишчини юк кўтарувчи техника уриб юборгани маълум қилинди.
Жанубий Кореянинг Сеосан шаҳрида жойлашган металлургия заводларидан бирида содир бўлган бахтсиз ҳодиса оқибатида 50 ёшли Ўзбекистон фуқароси ҳалок бўлди.
Бу ҳақда Yonhap News Agency маҳаллий ҳуқуқни муҳофаза қилувчи органларга таяниб хабар берди.
Маълум қилинишича, ҳодиса 8 март куни кечқурун юз берган. Завод ҳудудида ишлаётган ишчини юк кўтарувчи техника (forklift) уриб юборган. Жабрланувчи зудлик билан шифохонага етказилганига қарамай вафот этган.
Ҳозирда полиция ҳодиса сабабларини ўрганмоқда. Дастлабки тахминларга кўра, forklift ҳайдовчиси корхона ҳудудида ҳаракатланаётган пайтда ишчини пайқамай қолган бўлиши мумкин.
Қайд этилишича, мазкур пўлат заводида беш нафардан ортиқ ишчи фаолият юритади. Шу сабабли ҳодиса Жанубий Кореянинг Жиддий саноат бахтсиз ҳодисалари тўғрисидаги қонуни доирасида кўриб чиқилмоқда.
Мазкур қонун асосида корхонада меҳнат хавфсизлиги талабларига риоя этилган-этилмагани ҳамда корхона раҳбариятининг жавобгарлиги юзасидан батафсил текширув ўтказилиши кутилмоқда.
