Toshkent viloyati hokimi Zoir Mirzayev 2 mingga yaqin maktabgacha ta’lim muassasalari tarbiyalanuvchisining ommaviy zaharlanishi yuzasidan mas’ul shaxslarni lavozimidan ozod etish zarurligini bildirdi.
Bu haqda viloyat rahbari 6-oktabr kuni xalq deputatlari viloyat kengashining sessiyasida ma’lum qildi.
“Hamma darajadagi sanitariya-epidemiologiya nazorati tizimi rahbarlarini ishdan bo‘shatish kerak. Hududiy bo‘limlardan tortib, viloyat boshlig‘igacha — barchasi javobgarlikka tortilishi lozim”, — dedi Zoir Mirzayev.
Uning ta’kidlashicha, zaharlanishdan so‘ng zarur dori vositalari o‘z vaqtida yetkazilgani tufayli holat og‘ir oqibatlarga olib kelmagan.
“Xudo saqladi. Agar dori-darmonlar o‘z vaqtida yetkazilmaganida, oqibatlar yanada ayanchli bo‘lishi mumkin edi”, — dedi viloyat hokimi.
Mirzayev, shuningdek, mazkur voqea bo‘yicha hozirda 11 nafar shaxs javobgarlikka tortilganini va ularning barchasi hibsga olinganini ma’lum qildi.
Eslatib o‘tamiz, 25-sentabr kuni Toshkent viloyatining bir necha tuman va shaharlari — Bo‘stonliq, Piskent, Oqqo‘rg‘on, Quyichirchiq, Olmaliq, Nurafshon va Bekoboddagi bog‘chalarda 1900 nafardan ortiq bola ommaviy ravishda zaharlangani xabar qilingan edi. Mazkur holat yuzasidan Jinoyat kodeksining 257-1-moddasi (sanitariya qoidalarini buzish) bilan jinoyat ishi qo‘zg‘atilgan.