Жаҳонгир Ортиқхўжаев вакцина олди(ми)? Масалага расмий жавоб берилди
Бугун Тошкент шаҳар ҳокими Жаҳонгир Ортиқхўжаевнинг коронавирусга қарши эмлангани ҳақида видео тарқалди. Унда ҳоким ўзбек-хитой вакцинаси билан эмланганини айтади. Бироз вақтдан сўнг турли ижтимоий тармоқларда тарқалган видеоларда гўёки мутасадди барчани алдагани, аслида эса вакцина олмагани, ҳаттоки ҳамшира игна қопқоғини ҳам очмагани кўрсатилди.
Бу ҳолат шубҳасиз кишиларнинг айтиш жоиз бўлса ҳайратига ва эмланиш доирасидаги муҳокамаларнинг янада авж олишига сабаб бўлди. Кўпчилик орасида юқори лавозим эгалари ўзлари эмланмайдилар-у, оддий халқни вакцинага ундашяпти деган гап сўзлар яна жонланди.
Мана шундай муҳокамаларга чек қўйиш ва аслида ҳаммаси умуман бошқача бўлганини кенг жамоатчиликка исботлаш мақсадида Тошкент шаҳар ҳокимияти матбуот хизмати ҳокимнинг вакцина олиш эараёни билан боғлиқ видеонинг тўлиқроқ вариантини тақдим этди.
Тошкент шаҳар ҳокимлиги матбуот хизмати вакилининг маълум қилишича, вакцина игнаси дорини тортиш учун торлик қилади. Шунинг учун бошқа игна билан тортилади.
“Ҳоким елкасида игнанинг қопқоғидек кўринган нарса – шприцнинг "уплотнитель" деб аталувчи қисми. Бу ерда игналарнинг бири кўк, иккинчиси шаффоф "уплотнитель", – дейилади хабарда.
