Ўқитувчи изланувчан ва ташаббускор бўлса, ўқувчилар билимли, ақл-заковатли бўлади

 

 

Пойтахтимизнинг Яккасарой туманидаги 48-сонли умумтаълим мактабининг ўқувчилари ҳам олган билимларини оқлаб, кўзлаган марраларига эришмоқда. Хусусан, мактабнинг 7 синф ўқувчиси Омадбек Одилов “Тошкент ёшлар форуми – 2020” тадбирининг заковат турнирида фаол иштирок этиб, ғолиб бўлган ёшлардан. Омадбек Тошкент шаҳар ҳокимининг қимматбаҳо совғаси ва дипломи билан тақдирланди. Унинг бу ютуғидан ота-онаси, устозлари, тенгдошлари, бутун мактаб жамоаси бирдек қувонди.

 

Шунингдек, 2020/2021 ўқув йилида фан олимпиадасида француз тилидан Ж.Абдуғаниев ва А.Тиллаевлар шаҳар босқичида фахрли ўринларни эгаллади. Бунда албатта, фан ўқитувчиси Халқ таълими аълочиси Алла Набокинанинг хизмати катта. Дарҳақиқат, ўқувчининг ютуғи ва юксалишида, албатта, устознинг захматли меҳнати катта.

 

Зеро Президентимиз таъкидлаганидек, “Ёш авлодга таълим-тарбия бериш, уларни баркамол вояга етказишда устоз-мураббийнинг ўрнини ҳеч нарса билан қиёслаб бўлмайди. Заҳматкаш касб эгалари ўғил-қизларимизнинг дунёни англашига кўмак бериш, уларни илму фан оламига олиб киришдек улуғ вазифани шараф билан адо этиб келмоқдалар.”

 

Ёшлар маънавиятини юксалтириш ва уларнинг бўш вақтларини мазмунли ташкил этиш мақсадида 5 та муҳим ташаббус доирасида таълим масканида адабиёт, спорт, технология каби фанлардан ташкил этилган тўгараклар фан ўқитувчилари томонидан мунтазам йўлга қўйилган. Улар бу йўналишлар бўйича ҳам кўплаб марраларни забт этишмоқда. Хусусан, спортнинг бадиий гимнастика тури бўйича Ўзбекистон чемпиони Самира Aҳмедова ҳамда мактабнинг баскетбол жамоаси эришаётган ютуқлари, шулар жумласидан. Шунингдек, Асила Aралова адабиёт йўналишида туманда иншолар танловида фахрли ўринларни эгаллаб келмоқда.

 

Ушбу мактаб ўқитувчиларининг 4 нафари Халқ таълими аълочиси, 16 нафари Олий тоифали эга. 14 нафари эса Иккинчи тоифали, бир нафари PHD математика ўқитувчиси унвонига эга.