Хоразм ва Қорақалпоғистондаги 2 та мактаб битирувчиларининг барчаси талаба бўлди
Талаба учун энг бахтли онлардан бири бу — ҳужжат топширган грант дастуридан шахсий электрон манзилга «Табриклаймиз, Сиз грант соҳиби бўлдингиз!», деган мактубни олиш бўлса керак.
Бу қувончли онлар нафақат талабалик бахтига муяссар бўлган йигит-қиз, балки уларнинг ота-онаси, яқинлари ва устозлари учун ҳам бирдек ёқимли лаҳзаларни туҳфа этади.
Айниқса, мактаб битирувчиларининг барчасига талабалик бахтининг насиб этгани камдан-кам учрайдиган ҳолат. Хоразм ва Қорақалпоғистондаги 2 та мактаб битирувчилари эса ана шу бахтга сазовор бўлди.
Хусусан, Хоразм вилояти Янгиариқ тумани Таган қишлоғидаги 28-мактаб, Қорақалпоғистоннинг Амударё тумани 56-сонли мактаб Технология йўналишидаги вариатив синфларнинг 11-«б» синф битирувчилари 100 фоизлик натижа билан талабаликка қабул қилинди.
Шунингдек, Амударё туманидаги 40-мактаб вариатив синфининг 27 нафар битирувчисидан 24 нафари талабаликка қабул қилинган. Улардан 8 нафари давлат гранти, 17 нафари тўлов шартнома асосида ўқишга кирган. Бу 93 фоизлик натижа.
Қўнғирот тумани 2-сонли мактабдаги Технология йўналиши бўйича вариатив синфда 31 битирувчидан 27 нафари (87 фоизи) талаба бўлган.
Амударё тумани 56-сонли мактаб Технология йўналишидаги вариатив синфларнинг 11-«в» синф 88 фоизлик, жами 94 фоиз ўқувчилар ОТМга ўқишга кирган.
Эслатиб ўтамиз, аввалроқ, тест жавобларининг чиқиши аниқ бўлгани ҳамда мандат натижаларини қандай билиш мумкинлиги ҳақида хабар берилганди .
