Қашқадарёда депутатларнинг рухсатисиз 10 миллиард сўмга яқин маблағ ишлатиб юборилгани маълум бўлди

 

 

– Маҳаллий бюджетларда шаклланган қўшимча манбалардан фойдаланишда қатор камчиликларга йўл қўйилмоқда, – деди Сенат Раиси Т.Нарбаева.  – Ушбу маблағларни ишлатишда маҳаллий Кенгашлар ҳал қилувчи вазифани бажаради. Бироқ улар бунга талаб даражасида қарамаяпти. Биргина Қашқадарё вилоятининг Ғузор, Миришкор, Касби, Чироқчи туманлари ва Қарши шаҳрида маҳаллий Кенгашларда муҳокама қилинмасдан, депутатларнинг рухсатисиз 10 млрд сўмга яқин маблағ ишлатиб юборилган.

 

Умуман, бундай ҳолатларни бошқа ҳудудлар мисолида ҳам келтириш мумкин. Маҳаллий Кенгашлар қонун билан ўзларига берилган ваколатларни чуқур англаб, амалда самарали фойдаланган ҳолда талабчанлик оширмас эканлар бу каби муаммолар камаймайди. Шу жиҳатдан, маҳаллий Кенгашлар вакиллари, айниқса, бюджет бўйича доимий комиссия аъзолари, шу жумладан, котибиятлар бу борада масъулиятни оширишлари лозим.

 

“Жойларда биринчи масала асосан режалаштирилган уй-жой массивлари қурилишида кечикишлар борлигидир, буни тан олишимиз керак. Июл-август ойлари давомида Ўзбекистон Республикаси бош вазири биринчи ўринбосари билан вилоятларда бўлиб келдик, жойларда ҳақиқатан субсидия ажратишда муаммо бор. Асосий муаммо уй-жой қуришда кечикишлар бўлаётган бўлса, иккинчи масала уй-жой олиш учун критерияларга мос келмаслик ҳолатлари мавжудлиги.

Биз ипотека бозорини ривожлантириш бўйича дастур ишлаб чиққанимизда маълум бир тўлов қобилиятига эга оилаларни ва даромади паст фуқароларни уйнинг бошланғич бадалига фоизни тўлаб беришни назарда тутгандик. Лекин жойларда асосий кўтарилаётган масалалардан бири бу оилалар бутун маблағни тўлаб бериш масаласини қўяётганидир. Буни алоҳида ўрганиб чиқяпмиз, таклиф берамиз”, — деди Молия вазири ўринбосари Аҳадбек Ҳайдаров.

 

Аввалроқ Ўзбекистон Олий Мажлиси Сенати раиси Танзила Норбоева ўзининг телеграм саҳифаси орқали Гендер тенгликни таъминлаш стратегиясида хотин-қизларни илмий фаолиятга кенг жалб қилиш, уларнинг инновацион ғояларини, ихтирочилик, рационализаторлик фаолиятини қўллаб-қувватлаш масаласига алоҳида эътибор қаратганди. Шунингдек, 2022 йилда Ўзбекистонда жаҳон парламентларининг аёл раҳбарлари саммити бўлиб ўтиши ҳамда Туркманистонда Марказий Осиё етакчи аёллари мулоқотининг форуми ўтказилгани ҳақида хабар берилганди.