Сергей Лавров Афғонистон қўшниларига илтимос билан чиқди

 

Россия Афғонистон қўшниларидан НАТО қўшинларини ўз ҳудудида жойлаштирмасликни сўради. Бу ҳақда Россия ташқи ишлар вазири Сергей Лавров Теҳронда бўлиб ўтаётган Афғонистонга қўшни давлатлар ташқи ишлар вазирлари учрашувида айтиб ўтган.

 

“Афғонистон қўшниларидан ўз ҳудудларида АҚШ ва НАТО кучларини жойлаштирмасликни сўраймиз”, – деган Лавров.

 

Унинг сўзларига кўра, ҳозирда Ғарб ҳарбий раҳбариятининг шундай  режаси бор.

 

Маълумот ўрнида: Афғонистонда 15 август куни ҳокимият “Толибон” қўлига ўтди. Шундан кейин АҚШ ва Ғарб қўшинлари олиб чиқиб кетилиши тезлаштирилди. Айрим давлатларнинг фикрича, АҚШ Афғонистон қўшнилари ҳудудида контртеррор кучларни жойлаштиришга ҳаракат қилмоқда. Хусусан, Ўзбекистонга ҳам шундай таклиф келиб тушгани хабар қилинди. Аммо кейинчалик бу мудофаа вазирлиги томонидан инкор қилинди.

 

Бундан аввал Афғонистонда ИШИД ҳолати ҳамда Хитой "Толибон" билан иқтисодий ҳамкорликнинг асосий шартини маълум қилгани хабар қилинганди.