Ажойиб нокаутлар ва ҳаяжонли жанглар намойиш этишга тайёрман – Шоҳжаҳон Эргашев
Спортчи профессионал боксга қайтмоқда.
Жорий йилнинг 24 январь куни Шоҳжаҳон Эргашев боксдаги фаолиятини якунлаб, ўзини бошқа соҳада синаб кўрмоқчи эканлигини айтганди.
1 февраль куни Шоҳжаҳон билан судлашаётган "Salita" промоутерлик компанияси Инстаграм тармоғидаги саҳифасида Эргашевнинг навбатдаги жангига шама қилинган постерни эълон қилди. Мазкур постерга боксчи “Энди шошмай туринглар”, дея шарҳ бериб, уни қайта улашди.
Шоҳжаҳон Эргашев эса буни қуйидагича изоҳлаган:
"Ўзимни жуда илҳомланган ҳис қиляпман ва рингда устунлик қилишга тайёрман. "Salita Promotions" билан келишувимиз иккала томон учун ҳам фойдали ва самарали бўлди, фаолиятимни давом эттиришдан мамнунман.
Америкалик мухлисларимни соғиндим, яна бир бор рингда куч ва маҳоратимни ишга солиб, ажойиб нокаутлар ҳамда ҳаяжонли жанглар намойиш этишга тайёрман".
Маълумот учун: Шоҳжаҳон Эргашев проф боксда жами 21 та жанг ўтказган ва уларнинг барчасида ғалаба қозонган. 19 та жангда рақибларини нокаут эвазига мағлубиятга учратган.
