“Украинада Кобул сценарийси такрорланиши мумкин” — Швеция парламенти
Депутат ТИВдан Киевдаги элчихонани эвакуация қилишни сўради.
Швеция парламенти аъзоси Бьорн Сёдер мамлакатлакатнинг Украинадаги элчихона ходимлари хавфсизлигини таъминлаш кераклигини айтмоқда. У ўз қарашларини Швеция Ташқи ишлар вазири Ан Линдега тушунтириб берди. Бу ҳақда RT хабар қилди.
Сёдернинг айтишича, АҚШ ва Буюк Британия Киевдаги дипломатик миссиянинг айрим ходимларини мамлакатдан олиб чиқмоқда. Вашингтон ва Лондон бундай қарорга “Россия томондан ўсаётган хавф” сабаб бўлганини айтган.
“Ўз навбатида, Швеция ва ЕИнинг бошқа давлатлари ҳозирча бундай ҳаракат қилмаяпти”, - деган депутат.
У Швеция ТИВ Афғонистондаги воқеаларга ҳам кечикиб реакиция билдирганини эслатиб ўтди. Ўшанда ҳукумат Толиблар қўлига ўтганидан сўнг элчихона ходимлари эвакуацияси бошланган.
Шунинг учун Сёдер Линдедан у Киевдаги элчихона ходимларининг хавфсизлигини таъминлаш учун нима қилаётганини сўради.
Маълумот ўрнида: Сўнгги ойларда Ғарб Россиянинг Украинага бостириб кириши мумкинлигини айтиб келмоқда. Ўз навбатида Москва бу каби айбловларни рад этяпти.
Эслатиб ўтамиз, аввалроқ Пентагоннинг расмий вакили Жон Кирби АҚШ европадаги қўшимча кучлари Украинага ҳам жўнатилиши мумкин маълум қилганди.
Шарофат Маҳмудова
