Газ шантажи Россияга санкциялардан қочиш имконини бермайди — Байден
АҚШ Европани бошқа давлатлар орқали газ билан таъминламоқчи.
Қўшма Штатлар Россиянинг нефт ва газдан фойдаланиш орқали агрессия оқибатларидан қочишига йўл қўймайди. Бу ҳақда президент Жо Байден Тwиттеръдаги саҳифасида маълум қилди.
"Кеча Россия икки иттифоқдошимизга энергия таъминотини тўхтатиб қўйиш билан таҳдид қилди. Мен аниқ айтаман: биз Россияни қўрқитиш ёки шантаж йўли билан санкциялардан қочишига йўл қўймаймиз.
Европа иттифоқига уларнинг энергияга бўлган эҳтиёжини бошқа йўллар билан қондиришга ёрдам бериш борасидаги саъй-ҳаракатларимизни қўллаб-қувватлаётган бошқа давлатлар билан ишлаймиз.
Жанубий Корея, Япония ва Қатар каби давлатлар, шулар жумласидандир”, — деб ёзади Байден.
У содир бўлаётган воқеалар фонида Европа ва дунё тоза энергияга ўтиши кераклигини яна бир бор таъкидлаб, АҚШ буни ҳозирданоқ қилаётганини қўшимча қилди.
Эслатиб ўтамиз, "Газпром" Польша ва Болгарияга газ етказиб беришни тўхтатганини эълон қилди.
