Қишлоқ хўжалиги вазири БМТ конференциясида маъруза қилди
Вазир сессияда озиқ-овқат хавфсизлиги, агро озиқ-овқат тизимлари ва бошқа масалаларга тўхталган.
10–13 май кунлари Полшанинг Лодз шаҳрида Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) Европа минтақавий конференсиясининг 33-сессияси бўлиб ўтмоқда. Унда ташкилотнинг Европа ва Марказий Осиё минтақасидаги аъзолари иштирок этмоқда.
Ҳар икки йилда бир марта ўтказиладиган Минтақавий конференсия расмий форум бўлиб, унинг доирасида Европа ва Марказий Осиё минтақасидаги ФАОга аъзо барча мамлакатларнинг қишлоқ хўжалиги вазирлари ва бошқа юқори даражадаги расмийлари озиқ-овқат ва қишлоқ хўжалиги ишлаб чиқариш масалаларини муҳокама қилиш учун йиғилишади ва бу билан минтақанинг озиқ-овқат тизимлари барқарорлигини таъминлашга ҳисса қўшишади.
Ўзбекистон Республикаси қишлоқ хўжалиги вазири Жамшид Ходжаев конференсияда сўзга чиқиб, ФАОнинг Европа ва Марказий Осиё бўйича минтақавий конференсиясининг 32-сессияси якунлари бўйича маъруза қилди. Вазир 2020-йил ноябр ойида мазкур конференсиянинг 2022-йилгача раиси этиб сайланган эди.
Вазир озиқ-овқат хавфсизлиги, агро-озиқ-овқат тизимлари ва бошқа кўплаб соҳаларга оид масалаларга тўхталди. Шунингдек, у минтақа давлатлари ўртасидаги ҳамкорлик ва ФАО билан ҳамкорлик муҳимлигини ҳам таъкидлаб ўтди. ФАО минтақавий бюроси 2020-2022-йилларда минтақавий конференсияга самарали ва конструктив раислик қилгани учун вазир Ходжаевга миннатдорчилик билдирди.
