Хоразмда 70 ёшли эркак ўз маҳалладошини пичоқлаб қўйди
Ҳодисага пул олди-бердиси сабаб бўлган.
Хоразм вилоятининг Тупроққалъа туманида 28 август куни 70 ёшли эркак ўз маҳалладошини пичоқлаб қўйди. Бу ҳақда вилоят ИИБ ахборот хизмати хабар қилди.
Маълум бўлишича, қотилликка пул олди-бердиси масаласида келиб чиққан низо сабаб бўлган. Туманнинг “Оҳунбобоев” маҳалласида яшовчи 70 ёшли эркак ўзи билан бир маҳаллада истиқомат қилувчи 48 ёшли фуқарони ошхона пичоғи билан унинг кўкрак қисмига санчиб, қасддан ўлдирган.
Ҳозирда мазкур ҳолат юзасидан гумондор эҳтиёт чораси сифатида қамоққа олинган ва дастлабки тергов ҳаракатлари ўтказилмоқда.
