ТИВ раҳбари Қозоғистон ва Жазоир элчиларини қабул қилди
Мамлакат элчиларининг Ўзбекистондаги дипломатик миссияси ниҳоясига етди.
Ўзбекистон Ташқи ишлар вазири Владимир Норов Қозоғистон ва Жазоирнинг Ўзбекистондаги Фавқулодда ва Мухтор элчилари билан учрашди.
ТИВ раҳбари дастлаб Ўзбекистондаги дипломатик миссиясини якунлаётган Қозоғистон Фавқулодда ва Мухтор Элчиси Дархон Сатибалдини қабул қилди. Суҳбат давомида элчи томонидан Ўзбекистон-Қозоғистон яхши қўшничилик, стратегик шериклик ва иттифоқчилик муносабатларини мустаҳкамлашга қўшган ҳиссаси эътироф этилди. В.Норов Д.Сатибалдини Туркистон вилояти Aким лавозимига тайинлангани билан табриклади. Томонлар Ўзбекистон-Қозоғистон давлати билан ҳамкорлигининг долзарб масалалари, илгари эришилган келишувлар ижроси ва турли даражадаги бўлажак учрашувлар жадвалини кўриб чиқдилар.
Ўзбекистон Ташқи ишлар вазири, шунингдек, мамлакатда дипломатик миссиясини якунлаётган Жазоир Халқ Демократик Республикасининг Фавқулодда ва Мухтор Элчиси Носир Бушеритни қабул қилди. В.Норов томонидан элчининг Ўзбекистон-Жазоир муносабатларини мустаҳкамлашга салмоқли ҳисса қўшгани алоҳида қайд этилди. Н.Бушерит ҳам ўз навбатида Ўзбекистондаги дипломатик фаолияти мобайнида республикада кенг кўламли ислоҳотлар ва мамлакатнинг жадал тараққиётига гувоҳ бўлганини таъкидлаб ўтди.
