Запорожье АЭСда ишлаётган ягона энергоблок тўхтатиб қўйилди
Украина станцияни ўққа тутишда давом этаётгани айтилмоқда.
Запорожье АЭСнинг олтинчи блоки якшанбага ўтар кечаси тўхтатилди. У станцияда ишлаб келаётган ягона энергоблок эди.
Запорожье вилоятининг россияпараст маъмурияти вакили Владимир Роговнинг сўзларига кўра, у маҳаллий вақт билан 03:45 да тўхтатилган. АЭСнинг бешинчи блоки авариявий ҳолатда бўлгани учун аввалроқ ишдан чиққанди.
Россия томони бунга Украина ҳарбийларининг доимий равишда ўт очишини сабаб қилиб кўрсатган.
Запорожье вилояти ҳарбий-фуқаролик маъмурияти раҳбари Евгений Балицкий бу маълумотларни тасдиқлаб, АЭС фаолияти бутунлай тўхтатилиши мумкинлигини ҳам инкор этмади.
