Ташқи ишлар вазири ЕХҲТ бош котиби билан учрашди
Учрашув БМТ Бош ассамблеясининг 77-сессияси доирасида бўлиб ўтган.
БМТ Бош Ассамблеясининг 77-сессияси доирасида Ўзбекистон Республикаси Ташқи ишлар вазири Владимир Норовнинг Европада хавфсизлик ва ҳамкорлик ташкилоти Бош котиби Ҳелга Мария Шмид билан учрашуви бўлиб ўтди.
ТИВ раҳбари Ўзбекистон ЕХҲТни ҳарбий-сиёсий, иқтисодий, экологик ва инсоний ўлчовларда хавфсизлик масалалари бўйича сиёсий мулоқот учун ноёб халқаро платформа деб билишини қайд этди.
Ўзбекистон ва ЕХҲТ ўртасида ҳамкорлик кенгайиб бораётгани қайд этилди. Жумладан, 2021 йили Трансмиллий таҳдидларга қарши курашиш, инсон ҳуқуқларини ҳимоя қилиш, гендер тенглигини тарғиб қилиш, давлат бошқаруви самарадорлигини ошириш, рақамли ва «яшил» иқтисодиётни ривожлантириш, атроф-муҳитни муҳофаза қилиш каби соҳаларда ЕХҲТ лойиҳаларини амалга ошириш бўйича "Йўл харитаси" қабул қилинди.
Х. Шмид Ўзбекистонда амалга оширилаётган кенг кўламли ислоҳотларни, айниқса гендер тенглигини таъминлаш масалаларига қаратилаётган эътиборни олқишлади.
Расмий Тошкентнинг хорижий шериклар билан ҳамкорлик ва минтақавий ўзаро боғлиқликни ривожлантириш, шунингдек, қўшни Афғонистонга кўмаклашиш борасидаги саъй-ҳаракатларига юқори баҳо берилди.
Томонлар, шунингдек, ЕХҲТнинг Ўзбекистондаги лойиҳа фаолиятини ҳарбий-сиёсий, иқтисодий, экологик ва инсоний ўлчовларда кенгайтириш масалаларини муҳокама қилдилар.
a
