Сурхондарёда ЙПХ инспекторларини ҳақорат қилган ака-укалар қамалди
Улар, шунингдек, ходимланинг устига машина ҳайдамоқчи бўлган.
Сурхондарё вилоятининг Денов туманида ЙПХ инспекторларининг қонуний талабни бажармаган ака-укалар 15 суткага қамалди. Бу ҳақда ЙҲХХ хабар бермоқда.
Маълум бўлишича, 19 ноябрь куни тахминан соат 09:00 да Денов тумани “Буюк келажак” маҳалласи ҳудудида хизмат вазифасини бажараётган Йўл ҳаракати хавфсизлиги бошқармаси икки нафар ходими Nexia русумли автомобилни тўхтатади. Тегишли ҳужжатларни тақдим этиш сўралганда 1990 йилда туғилган ҳайдовчи ва унинг яқин қариндошлари бўлган йўловчилар инспекторларнинг қонуний талабларини бажармай, ҳақорат қилади. Шунингдек, фуқаро машинани испекторнинг устига ҳайдамоқчи бўлади.
ЙПХ ходимининг билдиргисига асосан профилактика инспекторлари билан ҳамкорликда тезкор суриштирув ишлари олиб борилиб, ҳуқуқбузарларга нисбатан тўпланган ҳужжатлар чора кўриш учун жиноят ишлари бўйича Денов тумани судига тақдим қилинган.
Суд ҳукмига кўра, жамоат тартибини бузган ака-ука Маъмурий жавобгарлик тўғрисидаги кодекснинг 183-моддаси, 194-моддаси 1-қисми билан ҳуқуқбузарлик содир этганликда айбланиб, уларга нисбатан 15 сутка қамоқ ва БҲМнинг 5 баравари миқдорида жарима жазоси қўлланилди.
