Деновда 6 киши “Дамас” ҳайдовчисини дўппослади

 

Ижтимоий тармоқларда Сурхондарё вилоятининг Денов туманида икки киши аёвсиз калтаклангани ҳақида хабарлар тарқалди. Ҳолат юзасидан вилоят прокуратураси расмий баёнот берди.

 

Ҳолат жорий йилнинг 11 ноябрь куни соат 12:30 ларда Денов шаҳар “Жомий” маҳалласи ҳудудидан ўтувчи автомобиль йўли бўйида юз берган. Шу маҳаллада яшовчи фуқаро А.У. бошқарувидаги “Дамас” русумли автомашинаси билан ички йўлдан автомобиль йўлига ҳаракатланиб чиққан вақтида “ВАЗ” фургон русумли автомашинаси билан йўл талашиб, фургон автомашинаси ҳайдовчи вояга етмаган Э.М. ва олди йўловчи Б.С. билан ўзаро тортишиб, жанжалашиб уришгач, тарқалишган. 

 

Орадан 2 соат ўтиб, тахминан 14:30 ларда Э.М., Б.С. ўзларининг жиноий шериклари, Б.А., Ш.М., А.А., Б.Ш.лар билан биргаликда Денов тумани “Жомий” маҳалласида жойлашган фуқаро А.У.нинг “Барака” номли савдо дўкони ёнида А.У. ва У.А. билан жанжаллашиб қолишиб, бир-бирларига тан жароҳати етказган.

 

Мазкур ҳолат юзасидан Денов туман ИИБ ҳузуридаги Тергов бўлими томонидан Жиноят кодексининг 277-моддаси 2-қисми “б” банди (безорилик) билан жиноят иши қўзғатилган бўлиб, ҳозирда дастлабки тергов ҳаракатлари олиб борилмоқда. 

 

Жиноят ишининг тергови устидан прокурор назорати ўрнатилган.