Норозилик намойишлари ортидан Пекинда карантин чоралари юмшатилди
Ноябрь охирида Хитойнинг йирик шаҳарларида коронавирус чекловларига қарши намойишлар бўлиб ўтганди.
Пекинда 6 декабрдан коронавирус чекловлари юмшатилди. Хусусан, пойтахт аҳолиси супермаркет, савдо бинолари ва айрим жамоат жойларига бориши учун ПЦР-тест топшириши шарт эмас.
Бундан ташқари, тураржой биноларига кириш учун ҳам ПЦР талаби беркор қилинди. уйларда доимий яшайдиган аҳоли QR-код орқали махсус дастурдан ҳам сканер қилиши шарт эмас.
Шу билан бирга интернет-кафе, тунги клублар, тренажёр заллари ва умумий овқатланиш жойларига кириш учун коронавирус йўқлиги тўғрисида тест натижасини кўрсатиш зарур. У 48 соатдан кўп бўлмаган муддатда топширилган бўлиши керак.
Reuters агентлиги маълумотларига кўра, эртага, 7 декабрь куни чекловларни юмшатиш бўйича 10 та умуммиллий чора-тадбирлар эълон қилиниши мумкин.
Ноябрь охирида Хитойнинг кўплаб шаҳарларида COVID чекловларига қарши намойишлар бўлиб ўтди.
