Мўғулистон бош вазири халқига мурожаат қилиб, тинчланишга чақирди
Мамлакатда йирик миқдорда кўмир ўғирланиши билан боғлиқ можаро авж олмоқда.
Мўғулистон Бош вазири Лувсаннамсрайн Оюн-Эрдене халқ олдига чиқиб, давом этаётган норозилик намойишлари фонида аҳолини хотиржам бўлишга чақирди ва тартибсизликларга сабаб бўлган кўмир ўғирланишини текширишга ваъда берди.
"Биз имкон қадар тезроқ тергов ўтказиш устида ишлаяпмиз. Сиздан хотиржам бўлишингизни сўраймиз", — деди бош вазир.
Душанба куни Мўғулистон пойтахти Улан-Батордаги Ҳукумат саройи олдида бир неча минг киши иштирок этган намойиш бўлиб ўтди.
Одамлар кўмир ўғирланиши билан боғлиқ вазиятдан норози. Гап 1,8 миллиард доллар ҳақида кетмоқда. Мамлакат адлия вазирининг сўзларига кўра, Мўғулистон ҳукумати дипломатик каналлар орқали Хитой расмийларидан кўмир иши бўйича терговга қўшилишни сўраган, чунки Мўғулистон ўз экспортининг қарийб 86 фоизини Хитойга жўнатади ва бу ҳажмнинг ярмидан кўпи кўмир. Мўғулистондан экспорт қилинадиган кўмир миқдори Хитой томони олган миқдордан фарқ қилади. Маълумотларга кўра, Пекин Улан-Баторга бу ишга алоқадор мўғул сиёсатчиларининг исмларини топширган.
