Ҳиндистон ТИВ БМТни ислоҳ қилишга чақирди
Ташкилотнинг Хавфсизлик кенгашига Осиё, Жанубий Америка ва Африка давлатларини киритиш таклиф қилинмоқда.
Ҳиндистон ТИВ раҳбари Субраманьям Жайшанкар БМТни ислоҳ қилишга чақирди. Дипломат Ташкилотнинг Хавфсизлик кенгашига Осиё, Жанубий Америка ва Африка давлатларини киритиш кераклигини айтган.
“Жанубий Америка, Африка Осиё ва кичик оролларда жойлашган ривожланаётган давлатлар Хавфсизлик кенгашида ишончли ва доимий вакилларга эга бўлиши керак. Бундан буён уларнинг келажаги тўғрисидаги қарорлар бу давлатлар иштирокисиз қабул қилиниши мумкин эмас. Глобал институтлар, жумладан ушбу кенгашнинг иш методлари ва жараёнларини шаффоф, холис ва ҳисобдор қилиш керак”, – деган вазир.
БМТ фаолиятини ислоҳ қилиш масаласи Россиянинг Украинага ҳарбий агрессиясидан кейин бир неча бор кўтарилди. Хусусан, Хавфсизлик кенгашидан РФни чиқариб ташлаш ёки унга яна бир неча давлатни қўшиш таклифи мавжуд.
БМТ ХКга ҳозирда бешта давлат — АҚШ, Буюк Британия, Франция, Россия ва Хитой доимий аъзо ҳисобланади. Уларда ҳар қандай резолюция ёки қарорга вето киритиш ҳуқуқи бор.
