“Сурхондарё сув таъминоти” ходимлари 4 ойдан бери маош олмаяптими?
Вилоятда ичимлик ва оқава сувдан дебитор қарздорлик 54 млрд сўмдан ошиб кетган.
Ижтимоий тармоқларда “Ўзсувтаъминот” АЖ Сурхондарё вилояти бўлими ходимларига тўрт ойдан буён ойлик маошлари берилмаётгани ҳақида хабарлар тарқалди. Ҳолат юзасидан “Сурхондарё сув таъминоти” МЧЖ расмий муносабат билдирди.
Маълум қилинишича, вилоят бўйича ичимлик ва оқава сувдан дебитор қарздорлик 54 млрд сўмдан ошиб кетган. Шундан аҳоли қарздорлиги 51 млрд 380 млн, юридик ва бюджет ташкилотлар қарздорлиги 2 млрд 780 млн сўмни ташкил қилади.
“Истеъмолчилар тўловларни ўз вақтида амалга оширмагани боис ташкилот ойлик маош тўловларида кечикиш юзага келмоқда ва ушбу тўловларни амалга ошириш учун кредит маблағлари жалб қилинмоқда.
Шу ўринда Сурхондарё вилоятида жойлашган юридик ташкилотлар ва вилоятимизда истиқомат қилувчи фуқароларимиздан ичимлик суви учун тўловларни ўз вақтида амалга оширишларини сўраб қоламиз”, — дейилади хабарда.
“Сурхондарё сув таъминоти” МЧЖ ишчи ходимларига ойлик маошлари сентябрь ойига аванс пуллари берилган. Келгуси ҳафта якунига қадар тизимда фаолият юритаётган ходимлар маоши 1 декабрь ҳолатига тўлиқ тўлаб берилади.
