Сурхондарёда ЙПХ ходимига пора бераётган ҳайдовчи қўлга тушди

 

Сурхондарё вилоятининг Қумқўрғон туманида йўл-патруль хизмати ходимига пора таклиф этган ҳайдовчи тезкор тадбирда қўлга олинди. Бу ҳақда вилоят ИИБ ахборот хизмати хабар берди.

 

Қайд этилишича, ЙПХ ходимлари — Ш.Шарипов ва А.Юлдашевлар тунда Қумқўрғон тумани Боғаро маҳалласи ҳудудида хизмат олиб бораётганида Nexia-1 русумли автомашинани тўхтатиб, ҳужжатларини текшириб кўрмоқчи бўлади. Шу пайт автомашина ҳайдовчиси Т.Х.дан спиртли ичимлик ҳиди келиб турганини сезгач, уни хизмат юзасидан бириктирилган алкотестер мосламаси орқали текширувдан ўтказади. Мослама ҳайдовчининг алкоголь мастлик ҳолатида эканини аниқлайди.

 

Мазкур ҳолат бўйича сафдор А.Юлдашев T.Х.гa нисбатан МЖтКнинг 131-моддаси 1-қисмига мувофиқ электрон тарзда маъмурий баённома расмийлаштириб, транспорт воситасини жарима майдончасига жойлаштиради. Шундан сўнг T.Х. сафдор Ш.Шариповдан ўзига нисбатан расмийлаштирилган маъмурий баённомадаги ҳуқуқбузарликни бекор қилиб, автомашинани жарима майдончасидан чиқариб берса, эвазига 6 миллион сўм пул беришини таклиф қилган. Сафдор Ш.Шарипов ҳуқуқбузар ҳайдовчига унинг бу ҳаракати жиноят экани ва жиноий жавобгарлик мавжудлигини тушунтиришига қарамасдан T.Х. пора таклиф қилишда давом этган.

 

Ходимнинг тегишли билдиргиси асосида ўтказилган тезкор тадбирда T.Х. Қумқўрғон тумани Сурхон соҳили маҳалласи ҳудудида сафдор Ш.Шарипов бошқарувидаги Nexia-3 русумли хизмат автомашинасининг олд йўловчи ўриндиғига ўтириб, 6 миллион сўм пулни пора тариқасида берган вақтда тадбир иштирокчилари қўлига тушган.

 

Ушбу ҳолат юзасидан Бош прокуратура ҳузуридаги Иқтисодий жиноятларга қарши курашиш департаментининг Қумқўрғон тумани бўлими Жиноят кодексининг 211-моддаси 1-қисми билан жиноят иши қўзғатиб, тергов ҳаракатларини олиб бормоқда.