Россия кескинликни давом эттиришга қарор қилди — Макрон
Франция Президенти Путин билан музокара олиб бориш вақти эмаслигини айтди.
Россия билан тинчлик музокаралари олиб боришнинг иложи йўқ, чунки у кескинликни давом эттиришга қарор қилди. Бу ҳақда Франция Президенти Эммануэл Макрон Мюнхен хавфсизлик конференциясида айтиб ўтди.
“Ҳозир мулоқот вақти эмас, чунки Россия урушни кучайтиришни танламоқда. Москва фуқаролик инфратузилмасига ҳужум қилиб, уруш жиноятларини содир этишга қарор қилди. РФ бу урушда ғалаба қозона олмайди. Унинг ҳужуми шу билан якунланиши керак”, — деди у.
Макроннинг фикрича, цивилизациялашган дунёда куч ишлатиш одатий ҳолга айланиб қолмаслиги учун ҳаракат қилиши керак, акс ҳолда глобал барқарорлик сўроқ остида қолади. Шу муносабат билан Украинани қарши ҳужум учун ресурслар билан таъминлаш лозим.
“Биз Украинани қўллаб-қувватлаш борасидаги саъй-ҳаракатларимизни кучайтиришимиз керак, токи Украинанинг ўзи қарши ҳужумга ўтиши, ғалаба қозониши ва музокаралар жараёнини бошлаши мумкин”, — деган Франция президенти.
Унинг ишонтиришича, Франция бир неча ҳафта ва ойлар ичида саъй-ҳаракатларини кучайтиришга тайёр.
