Оролбўйида Россия билан ҳамкорликда иккита қўшма клиника очилади
Бу ҳақда Соғлиқни сақлаш вазирлиги хабар берди.
Санкт-Петербург давлат педиатрия тиббиёт университети ва Қорақалпоғистон тиббиёт институти Оролбўйи минтақасида қўшма клиника очишни режалаштирмоқда. Бу ҳақда Соғлиқни сақлаш вазирлиги хабар берди.
Соғлиқни сақлаш вазири Амрилло Иноятов бошчилигидаги делегация “Соғлом жамият” форумида иштирок этиш учун Россиянинг Санкт-Петербург шаҳрида бўлиб турибди.
Делегация илк учрашувни Санкт-Петербург шаҳри губернатори ўринбосари Олег Эргашев билан ўтказди.
Амрилло Иноятовнинг сўзларига кўра, ҳозир Ўзбекистонда 22 та хорижий университет билан ҳамкорликда тиббиёт кадрлари тайёрланмоқда. Санкт-Петербург давлат педиатрия тиббиёт университети — шулардан бири.
Тошкент педиатрия тиббиёт институти ва Санкт-Петербург давлат педиатрия тиббиёт университети ўртасидаги келишув асосида 2018 йилдан буён қўшма таълим дастури асосида талабалар ўқитилмоқда. Шу кунларда биргина Санкт-Петербургдаги мазкур нуфузли олий ўқув юртида 300 нафарга яқин ўзбекистонлик талаба таҳсил олмоқда.
Мазкур университет ва Қорақалпоғистон тиббиёт институти ўртасида эришилган келишувга мувофиқ, халқаро қўшма таълим дастури асосида клиник ординатура ташкил этилган.
Шунингдек, мулоқотда Ўзбекистон Республикаси ихтисослаштирилган онкология ва радиология илмий-амалий тиббиёт маркази ҳамда Санкт-Петербург шаҳридаги Россия Федерацияси Соғлиқни сақлаш вазирлиги Н.Петров номидаги онкология миллий тадқиқот маркази ўртасида клиник ординатура бўйича қўшма таълим дастурини амалга ошириш масаласи кўриб чиқилди.
