Фарғонада болалар бепул тиббий кўрикдан ўтказилади
8-12 июнь кунлари тиббий акция доирасида Фарғона шаҳрида республиканинг етакчи шифокорлари болаларни кўрик ва диагностикадан ўтказади.
Фарғона вилоятида 8–12 июнь кунлари “Эзгулик манзили” номли тиббий хайрия акцияси ташкил этилади. Тадбир Фарғона вилояти Болалар кўп тармоқли тиббиёт марказида бўлиб ўтади.
Акция болалар саломатлигини мустаҳкамлаш, уларга юқори малакали тиббий ёрдам кўрсатиш ҳамда мураккаб касалликларга чалинган болаларни қўллаб-қувватлаш мақсадида ташкил этилмоқда.
Тадбир доирасида республиканинг етакчи шифокорлари ва тор соҳа мутахассислари томонидан болалар учун бепул тиббий кўрик ва маслаҳатлар ўтказилади. Шунингдек, замонавий диагностика текширувлари, даволаш муолажалари ҳамда зарур ҳолларда мураккаб жарроҳлик амалиётлари амалга оширилиши режалаштирилган.
Бундан ташқари, ота-оналарга болаларда учрайдиган касалликларнинг олдини олиш бўйича тавсиялар ҳам берилади.
Ташкилотчилар таъкидлашича, хайрия акциясидан кўзланган асосий мақсад болаларнинг соғлиғини тиклашга кўмаклашиш ва уларнинг соғлом ҳамда бахтли келажагига ҳисса қўшишдан иборат.
