Янги саратон дориси 15 та беморда ўсмаларни бутунлай йўқ қилди

Бош ва бўйин саратонини даволашда қўлланилаётган амивантамаб препарати бўйича халқаро клиник синовлар умидбахш натижаларни кўрсатди, дея хабар бермоқда The Guardian.

 

Тадқиқотчилар дорининг айрим беморларда ўсмаларни тўлиқ йўқ қилишга муваффақ бўлганини маълум қилди.

 

Нашрининг ёзишича, тадқиқот 11 мамлакатда ўтказилган бўлиб, унда бош ва бўйин саратонига чалинган 102 нафар бемор иштирок этган. Уларнинг барчасида касаллик аввалги кимётерапия ва иммунотерапия муолажаларига жавоб бермаган.

 

Синов натижаларига кўра, беморларнинг 43 нафарида ўсмалар кичрайган ёки бутунлай йўқолган. Шундан 28 нафарида ўсмалар сезиларли даражада қисқарган бўлса, 15 нафар беморда саратон ўсмалари тўлиқ бартараф этилган.

 

Лондондаги Саратон тадқиқотлари институти профессори Кевин Ҳаррингтон бу натижаларни “мисли кўрилмаган даражадаги кучли жавоб” деб баҳолади. Унинг таъкидлашича, тадқиқотда иштирок этган беморлар учун даволаш имкониятлари жуда чекланган бўлган.

 

Мутахассисларнинг қайд этишича, амивантамаб саратонга бир вақтнинг ўзида уч йўналишда таъсир қилади. Препарат ўсмаларнинг ўсишига ёрдам берувчи EGFR оқсилини блоклайди, саратон ҳужайраларининг даволашдан қочишида муҳим роль ўйновчи МЕТ сигнал йўлини тўсади ҳамда иммун тизимини фаоллаштириб, организмнинг ўсмага қарши курашишини кучайтиради.

 

Препаратнинг яна бир афзаллиги унинг қўллаш усули билан боғлиқ. Дори томир орқали эмас, балки ҳар уч ҳафтада бир марта тери остига юборилади. Тадқиқот давомида ножўя таъсирлар асосан енгил ва ўртача даражада кузатилган.

 

Амивантамаб препарати ҳозирда ўпка, йўғон ичак, мия ва ошқозон саратони бўйича ҳам қатор клиник синовларда ўрганилмоқда. Тадқиқот натижалари Чикагода бўлиб ўтадиган Америка Клиник Онкология Жамияти (АСCО)нинг йиллик конференциясида тақдим этилиши режалаштирилган.