Маймунчечак бўйича эълон қилинган фавқулодда ҳолат бекор қилинди
Касалланиш ва ўлим ҳолатларининг камайиши туфайли ЖССТ мпох эпидемиясини фавқулодда ҳолат мақомидан чиқарди.
Ўтган йилнинг августида Жаҳон соғлиқни сақлаш ташкилоти (ЖССТ) маймунчечак (мпох) эпидемиясини Африканинг бир нечта давлатлари бўйлаб хавфли тус олгани сабабли глобал фавқулодда ҳолат деб эълон қилган эди. Орадан бир йил ўтиб, ташкилотнинг фавқулодда вазиятлар бўйича қўмитаси навбатдаги йиғилишида ушбу мақом бекор қилинди.
ЖССТ бош директори Тедрос Гебреюсуснинг таъкидлашича, қарор вирус ўчоғи бўлиб келган Конго Демократик Республикаси, Бурунди, Серра-Леоне ва Угандада касалланиш ҳамда ўлим ҳолатларининг кескин камайгани билан боғлиқ.
Мутахассислар бугунга келиб вируснинг юқиш йўллари ва хавф омиллари ҳақида етарли билимга эга бўлди. Бу эса эпидемиянинг тарқалишини жиловлаш ва самарали чораларни кўриш имконини бермоқда.
Эслатиб ўтамиз, сўнгги йилларда маймунчечак 100 дан ортиқ мамлакатда қайд этилиб, қарийб 128 минг киши ушбу касалликка чалинган. Улардан 283 нафари ҳаётдан кўз юмган.
