"Швеция НАТОнинг иккинчи янги аъзоси бўлади"
Сўз Блинкенга.
АҚШ ҳукумати Швеция 11-12 июль кунлари Вилньюсда бўлиб ўтадиган альянс давлатларининг саммитида НАТОга аъзо бўлади, деб ҳисобламоқда. Бу ҳақда АҚШ Давлат котиби Энтони Блинкен «Euronews» телеканалига берган интервьюсида айтиб ўтди.
“Ишончим комилки, бу тез орада содир бўлади. Умид қиламанки, Швеция Финляндиядан кейин НАТОнинг иккинчи янги аъзоси сифатида қўшилади”, — деди жаноб Блинкен.
У Венгрия ва Туркия Швециянинг аризасини ҳали ратификация қилмаганини эслатди. Унинг сўзларига кўра, Туркия расмийлари қонуний манфаатларга эга, ҳозирча улар фақат Финляндия билан “муваффақиятли ишлаган”.
Россиянинг Украинадаги ҳарбий амалиёти фонида Финляндия ва Швеция 2022 йилнинг май ойида НАТОга қўшилиш учун биргаликда ариза берган эди. Финляндия иттифоқнинг барча давлатларидан розилик олди ва 4 апрель куни Брюсселда унинг НАТОга кириш маросими бўлиб ўтди. Туркия ҳукумати Швецияга қарши бир қатор шикоятларга эга, жумладан, террорчиларни экстрадиция қилишдан бош тортиш масаласи долзарб бўлиб қолмоқда.
