Деновлик эркак укасининг хотинини уриб, жағини синдириб ташлади
Ҳолат бўйича вилоят ИИБ маълумот берди.
Ижтимоий тармоқларда Сурхондарё вилоятининг Денов туманида келиннинг қайнакаси уни уриб, жағини синдириб ташлагани ҳақида видеолавҳа тарқалди. Ҳолат юзасидан вилоят ИИБ ахборот хизмати маълумот берди.
Ҳодиса 21 апрель куни соат 17:30 ларда Денов тумани «Элобод» маҳалласида юз берган. Мазкур маҳаллада яшовчи Q.Y. қариндоши J.M. исмли аёл билан аввалдан давом этиб келаётган оилавий низолари сабабли унинг яшаш уйида ўзаро жанжаллашиб қолган ва аёл танасининг турли жойларига қўллари билан уриб, тан жароҳати етказган.
Дастлабки маълумотларга кўра, беморга ўртача оғир тан жароҳатлари ташхиси қўйилган.
Ҳолат юзасидан Денов тумани ИИБ ҳузуридаги Тергов бўлими томонидан Жиноят кодексининг 105- моддаси 2-қисми «г» банди билан жиноят иши қўзғатилиб, тергов ҳаракатлари олиб борилмоқда. Гумонланувчи шахс Жиноят процессуал кодексининг 221-моддаси тартибида ушланган.
“Тергов ҳаракатлари Сурхондарё вилояти Ички ишлар бошқармаси томонидан назоратга олинганлигини маълум қиламиз”, – дейилади хабарда.
