Оила ярашди: 2 нафар вояга етмаган фарзандлар энди оила бағрида улғаяди

 

Яқинда бир ҳолат, таъбир жоиз бўлса қувонарли воқеа юз берди: Фуқаролик ишлари бўйича Термиз туманлараро судининг 2018 йил 25 октябрдаги қарори билан қарздор Х.С.дан Г.С. фойдасига икки нафар вояга етмаган фарзандининг моддий таъминоти учун ҳар ойда иш ҳақи ва бошқа даромадларининг 1/3 қисми миқдорида алимент ундириш белгиланган бўлсада, алимент пулларини тўлашдан қасддан бўйин товлаб келган.

 

Натижада Х.С. жами 14 034 847 сўм алимент пулларини тўлашдан бўйин товлаб келганлиги учун жиноят ишлари бўйича Термиз шаҳар судининг 2022 йил

 

22 сентябрдаги қарорига асосан МЖтКнинг 474-моддаси 1-қисмида кўрсатилган ҳуқуқбузарликни содир этганликда айбдор деб топилиб, тайинланган 15 сутка маъмурий қамоқ жазосини ўтаб чиқади. Бироқ бундан у ўзига тўғри хулоса чиқармасдан 2022 йил 1 августдан 2023 йил 1 февралга қадар 7 070 118 сўм алимент пулларини ҳам тўламасдан келган.

 

Буни қарангки, суд мажлисида жабрланувчи Г.С. дастлабки тергов даврида берган кўрсатмаларини тасдиқлаб, ярашув тўғрисидаги ариза билан мурожаат қилиб, судланувчи турмуш ўртоғи Х.С. билан ярашганлигини, етказилган моддий ва маънавий зарарни тўлиқ бартараф этганлигини, ярашув ихтиёрий равишда бирон-бир тазйиқлар бўлмаганлиги, айни пайтда унга нисбатан ҳеч қандай даъвоси йўқлигини билдирди.

 

Энг қувонарлиси, суддан ярашувни тасдиқлаб, судланувчига нисбатан бўлган жиноят ишини ҳаракатдан тугатишни сўради. Ўз ўрнида Х.С. ҳам ўз айбига тўлиқ иқрор бўлиб, қилган қилмишидан чин кўнгилдан пушаймонлиги, жабрланувчидан кечирим сўраб, унга етказилган зарарни бартараф этганлигини, ўзаро ихтиёрий равишда ярашиб олганлигини инобатга олиб, суддан ярашувни тасдиқлаб, унга нисбатан бўлган жиноят ишини ҳаракатдан тугатишни сўраб кўрсатув берди.

 

Муҳими, “оила” деган муқаддас қўрғон сақлаб қолинди. Ота-она хато-камчиликларини тушуниб етишди, фарзандлар энди кемтикликдан жовдирамайдиган бўлди, бир хонадон жамиятга қайтди. Шу боис, Ўзбекистон Республикаси ЖК 122-моддасининг 1-қисми билан айбланган С.Х.га нисбатан жиноят иши ярашганлиги муносабати билан тугатилди.

 

Шерзод Юлдашев,

Жиноят ишлари буйича Термиз шаҳар судининг судьяси