Туркиядаги ракета заводида портлаш содир бўлди
Портлаш оқибатида ҳалок бўлганлар бор.
Туркия пойтахти Анқарада 10 июнь куни ракета ва портловчи моддалар ишлаб чиқарадиган завод ҳудудида портлаш юз берди. Мамлакат Мудофаа вазирлиги маълумотларига кўра, портлаш оқибатида беш киши ҳалок бўлган ҳамда битта бинога зарар етган.
«Анқара вилоятининг Элмадаг туманидаги Машинасозлик ва кимё саноати ширкатига қарашли ракета ва жанговар каллаклар ишлаб чиқарадиган заводда портлаш юз берди. Оқибатда беш нафар ишчимиз ҳалок бўлди», - дейилади хабарда.
Ижтимоий тармоқларда маҳаллий аҳоли томонидан завод ҳудудида тутун кўтарилаётгани ҳамда тез ёрдам машиналари кетаётгани акс этган кадрлар тарқалди. Дастлабки маълумотларга кўра, портлаш портловчи моддалардаги реакция туфайли юз берган.
