Мармарис Туркиянинг энг машҳур сайёҳлик марказларидан биридир
Мармарис — икки денгизни боғлаган порт шаҳар.
Мармарис ўзининг табиий гўзаллиги, узун қирғоқ чизиғи, қарағай дарахтлари билан қопланган тепаликлардан ажойиб манзаралари, соҳиллари, қадимий шаҳарлари, кема портлари билан Муғланинг энг машҳур сайёҳлик марказларидан биридир.
Мармарис икки денгизни боғлаб турган географик жойлашуви билан минтақада минг йиллар давомида ҳукмронлик қилган кўплаб цивилизациялар учун асосий порт вазифасини бажариб келган. Бу муҳим порт шаҳарнинг милоддан аввалги 3400 йилларига тегишли қадимий харобаларини Мармарис шаҳрининг шимолидаги Асартепада кўриш мумкин.
Мармарис дам олишни, табиий гўзалликлардан завқланишни ва минтақанинг бой тарихини кашф қилишни хоҳлайдиганлар, шунингдек, феруза рангли денгиз ва олтиндек сариқ қумлардан баҳра олиб, сув ва қуруқликдаги спорт турларини синаб кўрмоқчи бўлганлар учун мукаммал манзилдир. Қуйида сайёҳлар учун шаҳарнинг диққатга сазовор жойлари ҳақида маълумот берилган.
Мармарис қалъаси
Мармарис шаҳрининг маркази қалъа ва порт минтақада жойлашган. Бугунги кунда музей бўлган ўрта аср қалъаси, порт атрофидаги бутун майдонни юқоридан кўриш имконини ва эски шаҳарнинг архитектурасини кўздан кечириш завқини тақдим этади. Ушбу тарихий биноларнинг аксарияти яхши сақланиб қолган. Археология музейи сифатида фойдаланилган «Мармарис қалъаси» Мармарисдаги ягона музейдир. Ушбу музейда Эллинистик, Рим ва Византия даврига оид «икки тутқичли кўза бўлаклари» билан бирга Книдос, Ҳисарўну ва Бургаз минтақаларида олиб борилган қазишмаларда топилган сопол идишлар, шиша идишлар, тангалар ва безак буюмлари намойиш этилади.
Мармарис тарихий бозори
Мармарис тарихий бозори ўтмишдан ҳозирги кунгача ўзининг гавжумлиги билан танилиб келмоқда. Бозорда эсдалик совғалари, кийим-кечак, зираворлар ва Мармарисга хос маҳаллий ҳунармандчилик буюмлари ташриф буюрувчиларга таклиф қилинадиган кўплаб дўконлар мавжуд.
Лорима қадимий шаҳри
Лорима қадимий шаҳри Бозбурун ярим оролининг жануби-ғарбий қисмида жойлашган Бозуккале қишлоғида иншо этилган. Шаҳардаги энг кўзга кўринган иншоот - антик қалъадир. Бозуккале бандаргоҳи круиз қайиқлари ва яхталар учун асосий тўхтаб дам олиш нуқтаси бўлиб, у ерда тушдан кейин Лориманинг қадимий деворлари орасида ажойиб манзаранинг гувоҳи бўлиши мумкин.
Яхта портлари (Мариналар)
Мармарис Жанубий Эгейдаги энг катта ва энг замонавий портлардан биридир. Бу порт қадимдан то ҳозиргача ўз қийматини йўқотмаган. Мазкур замонавий ва катта порт ҳозирда ҳашаматли яхталар ва қайиқларнинг тез-тез ташриф буюрадиган манзили ҳисобланади. Соҳил бўйлаб орол ва яриморолларни зиёрат қилиш учун ижарага олинадиган қайиқлар ҳам мавжуд.
Жаннат ороли
Жаннат ороли Мармарис шаҳри яқинидаги ярим оролда жойлашган. Қарағай ўрмонлари билан қопланган оролда унутилмас сувга шўнғиш тажрибасини тақдим этадиган қирғоқ чизиғи мавжуд. Шунинг учун ҳам бу ер қайиқ саёҳатлари учун жуда машҳур саналади. Оролнинг ландшафти қуёш ботишини кузатадиганлар ва ушбу онларни фотоаппаратга муҳрлайдиганлар учун унутилмас манзарани тақдим этади. Оролга келиб, кунни фақат сузиш ҳамда қуёшда тобланиш билан ўтказиш мумкин.
Яланжи бўғоз
Мармарисдан қаралганда, денгизнинг бўғозга ўхшаш қисми Жаннат оролини материк билан боғлайди. Шаҳар марказидан атиги 8 километр узоқликдаги бўғозга микроавтобусларда бориш мумкин. Босфорга етиб боргандан сўнг, у ердан Жаннат ороли ва Нимара ғорига қараб пиёда юрса бўлади. Яланжи бўғоз ўтмишда порт сифатида фойдаланилган. Эгей ва Ўрта Ер денгизининг энг нуфузли порти бўлган Мармарис порти Яланжи бўғозда жойлашган бўлиб, айни пайтда етакчи яхта ва туризм марказларидан бири ҳисобланади.
Бўзбурун
Бўзбурун Мармарисдан 45 километр жануби-ғарбда жойлашган сайёҳлик марказидир. Бу, айниқса, яхта туризми учун машҳур дам олиш маскани. Бу ерда ҳаёт жуда сокин ва атроф-муҳит нисбатан кам сонли аҳоли билан ўралгани сабабли жуда тинчдир. Ушбу кичик шаҳарчада кўплаб бутик меҳмонхоналар, панционатлар ва ресторанлар мавжуд.
Турунч кўрфази
Мармариснинг энг машҳур кўрфазларидан бири Турунч аквариумни эслатувчи соф феруза сувларига эга. Денгизга яқин жойда замонавий ва анъанавий ресторанлар, сайр қилиш йўлаклари ва ҳашаматли бутик меҳмонхоналарни кўриш мумкин. Турунчга машина ёки қайиқда борилади.
Амос кўрфази
Турунч ва Кумлубук оралиғида жойлашган Амос кўрфази тиниқ денгизи билан донг таратган. Кўзлардан узоқ бу ҳудудда жамоат транспорти йўқ, у ерга фақат машина ёки қайиқда бориши мумкин. Амос қадимий шаҳар харобаларини ҳам кўриш мумкин бўлган бу манзилда сув остига саёҳат қилиш унутилмас хотира бўлиб қолади.
Бордубет кўрфази
Қарағай ўрмонлари билан ўралган яна бир кўрфаз - «Бордубет»дир. Бу ерда қушларнинг хилма-хиллиги ҳукмрон бўлган кўрфазда уларнинг сайраши билан дам олиш учун ёқимли соҳил қидириш учун узоққа боришнинг ҳожати йўқ! Қишлоқда бунгалов ва чодирда яшаш имкониятлари мавжуд. Сокин кўрфаз бўлган Бордубетда қайиқ ёки каноэда сайр қилиш, балиқ овлашингиз ёки велосипедга миниш мумкин.
