Қонунчилик талабларига амал қилмаган мансабдорларга нисбатан тақдимнома киритилди
Рўйхатда Жиззах, Сирдарё ва Андижон вилоятлари ҳокимликлари ҳамда «Ўзавтосаноат» мансабдор шахслари ҳам бор.
Коррупцияга қарши курашиш агентлиги томонидан ўтказилган ўрганиш натижаларига кўра, Жиззах, Сирдарё ва Андижон вилоятлари ҳокимликларига, шунингдек, Маданият ва туризм вазирлиги ҳузуридаги Кинематография агентлиги, «Алоқабанк» АТБ ҳамда «Ўзавтосаноат» АЖларга очиқликни таъминлаш соҳасида йўл қўйилган камчиликларни бартараф этиш ҳамда хизмат вазифаларига масъулияцизлик билан ёндашган мансабдор шахсларга нисбатан тегишли интизомий жазо чорасини қўллаш тўғрисида тақдимнома киритилди.
Бундан ташқари, давлат ҳокимияти ва бошқаруви органлари фаолиятининг очиқлиги тўғрисидаги қонунчиликни бузганлик учун Санитария-эпидемиологик осойишталик ва жамоат саломатлиги хизмати мансабдор шахсига нисбатан МЖтКнинг тегишли моддалари билан маъмурий баённома расмийлаштирилиб, кўриб чиқиш учун судга юборилди.
Ҳозирда мазкур йўналишдаги ўрганишлар бошқа давлат органлари ва ташкилотлари фаолиятида ҳам давом эттирилмоқда.
