Иккита ташкилот судда давлат божини тўлашдан озод этилади
Сенат мажлисида «Давлат божи тўғрисида»ги қонун кўриб чиқилди.
Сенат қирқ иккинчи ялпи мажлисида «Давлат божи тўғрисида”ги қонунга ўзгартиш ва қўшимчалар киритиш ҳақида»ги қонун кўриб чиқилди.
Қонун билан Рақобатни ривожлантириш ва истеъмолчилар ҳуқуқларини ҳимоя қилиш қўмитасини ҳамда Иқтисодиёт ва молия вазирлиги ҳузуридаги Тадбиркорлик фаолиятини қўллаб-қувватлаш давлат жамғармасини судларга мурожаат қилиш чоғида давлат божини тўлашдан озод этиш назарда тутилмоқда.
Амалдаги «Давлат божи тўғрисида»ги қонуннинг 8-, 9- ва 10-моддаларида Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамда унинг ҳудудий органлари – ўз зиммасига юклатилган ваколатларига мувофиқ судлар кўриб чиқиши учун киритиладиган даъволар юзасидан давлат божини тўлашдан озод қилинган.
Киритилаётган ўзгартиш ва қўшимчаларга кўра, Тадбиркорлик фаолиятини қўллаб-қувватлаш давлат жамғармаси ҳамда Рақобатни ривожлантириш ва истеъмолчилар ҳуқуқларини ҳимоя қилиш қўмитаси ва унинг ҳудудий органлари томонидан фуқаролик ишлари бўйича судлар, иқтисодий судлар ва маъмурий судларга даъво ариза, ариза ва шикоятлар билан мурожаат қилинганда давлат божидан озод қилиниши назарда тутилмоқда.
Қонун сенаторлар томонидан маъқулланди.
