Дания ва Швеция Қуръонни ёқишни тақиқлаш масаласини кўриб чиқмоқда
Бунга cўнгги пайтларда муқаддас китобга бўлган ҳурматсизликлар ҳар икки давлат учун жиддий муаммоларни келтириб чиқаргани сабаб бўлган.
Дания ва Швеция ҳукуматлари сўз ва фикр эркинлиги бўлган ўзларининг асосий тамойилларини бузмаган ҳолда, Қуръон ва бошқа диний матнларни оммавий равишда ёқишни қандай қилиб тақиқлаш ёки чеклаш масаласини кўриб чиқмоқда. Бунга охирги пайтларда юз берган бир нечта шундай ҳаракатлар ҳар икки давлат учун жиддий муаммоларни келтириб чиқаргани сабаб бўлган.
Дания ташқи ишлар вазири Ларс Локке Расмуссен якшанба куни Даниянинг DR телерадиокомпаниясига ҳукумат мусулмон давлатлар элчихоналари олдида Қуръонни ёқишни тақиқлашнинг қонуний йўлини топмоқчи эканини айтди.
Швеция Бош вазири Улф Кристерссон ижтимоий тармоқларда унинг ҳукумати ҳам бундай ҳаракатларни тақиқлаш йўлларини қидираётгани ва бу масалани Дания бош вазири Метте Фредериксен билан муҳокама қилаётганини маълум қилди.
