Исроилнинг режалари қандай?

 

Reuters агентлигининг қайд этишича, Исроил расмийлари ҲАМАСни бутунлай йўқ қилиш ниятидалигини айтаётган бўлсалар-да, улар гуруҳни сезиларли даражада заифлаштириши мумкин, холос. Аммо уни бутунлай тугата олмайди.

 

Бир неча кундан бери Исроил ўзининг катта қўшинлари ҲАМАСни бутунлай йўқ қилиш учун Ғазога киришга тайёр эканини очиқ айтмоқда. Исроил Мудофаа вазири Ёав Галант қуруқликдан ҳужум тез орада бошланишини маълум қилди.

 

Reuters АҚШ ва Яқин Шарқ етакчилари ўртасидаги музокаралар жараёнидан хабардор манбаларга таяниб, Исроилнинг яқин келажакдаги стратегияси Ғазо сектори инфратузилмасини йўқ қилиш (тинч аҳолининг оғир қурбонлари бўлса ҳам) эканини ёзмоқда.

 

Таҳлилчиларга кўра, эҳтимолий сценарий шуки, Исроил имкон қадар кўпроқ ҲАМАС аъзоларини ўлдиради ёки қўлга олади, туннеллар ва ракета иншоотларини портлатади. Сўнгра Исроил қурбонлар кўпайган сари ғалабани эълон қилиш ва урушдан чекиниш йўлини қидира бошлайди.

 

Вашингтондаги агентлик манбасининг таъкидлашича, АҚШ президенти Жо Байденнинг баъзи ёрдамчилари Исроилнинг чиқиш стратегиясига эга эмаслигидан хавотирда. Давлат котиби Энтони Блинкен ва мудофаа вазири Ллойд Остин Яқин Шарққа сафарлари чоғида урушдан кейинги режага эътибор қаратиш зарурлигини таъкидлаган.

 

Reuters хабарига кўра, араб давлатлари расмийлари ҳам Исроилнинг аниқ режалари йўқлигидан хавотирда.

 

“Исроилнинг Ғазо бўйича якуний ечими йўқ. Унинг стратегияси минглаб бомба ташлаш, ҳамма нарсани йўқ қилиш ва ҳудудга киришдир, лекин кейин нима бўлади? Уларнинг "чиқиш стратегияси" йўқ", — деди агентликнинг хизматлардаги суҳбатдошларидан бири.

 

АҚШ президенти Жо Байденнинг Исроилга шошилинч равишда уюштирилган ташрифи Оқ уй вазиятнинг ёмонлашувидан қанчалик хавотирда эканини кўрсатади. Вашингтон икки жиддий муаммодан хавотирда: гуманитар инқирознинг кучайиши ва можаронинг Яқин Шарқдаги бошқа мамлакатларга ҳам тарқалиши хавфи.

 

Расмий равишда Байден АҚШнинг Яқин Шарқдаги энг яқин иттифоқчисига стратегик ёрдам кўрсатиш ва Исроилнинг Ғазо бўйича режалари билан танишиш учун келган.

 

Норасмий равишда у Бенямин Нетаняхунинг ҳукуматини бироз тийилишга чақирган. Қандай бўлмасин, Қўшма Штатлар Исроил армияси агар Ғазога кирса, у ерни қандай ва қачон тарк этишини билишни хоҳлайди.

 

Сўнгги кунларда Эрон Исроилнинг Ғазога бостириб кириши жавобсиз қолмаслиги ҳақида қаттиқ огоҳлантирди.

 

2006 йилда "Ҳизбуллоҳ" жангарилари ва Исроил ўртасидаги оғир ёки умуман ноаниқ уруш пайтида маълум бўлдики, Исроил танклари камуфляжланган миналардан зарар кўрган ҳамда яхши режалаштирилган тузоққа тушиб қолган.

 

Ўшандан бери "Ҳизбуллоҳ" Эрон ёрдамида ўзини қайта қуроллантирди (150 000 га яқин ракета арсеналига эга экани тахмин қилинади.)

 

Уларнинг аксарияти узоқ масофали ва аниқ бошқарув тизимларига эга. Яъни, Исроил Ғазога бостириб кирса, "Ҳизбуллоҳ" шимолий чегарада янги фронт очиб, уни бир вақтнинг ўзида икки фронтда жанг қилишга мажбурлаши мумкин бўлган — ҳақиқий таҳдид мавжуд.

 

Бундан ташқари, Исроилнинг араб қўшнилари гуманитар йўлаклар яратиш чақириқларига кескин муносабат билдиришмоқда: улар босқин қочқинларнинг оммавий чиқишига сабаб бўлишидан, кейинчалик уларни қабул қилган мамлакатларда абадий яшашидан қўрқишади. Миср президенти Абдулфаттоҳ ас-Сисининг айтишича, "миллионлаб мисрликлар" қочқинларни қабул қилишга қарши норозилик билдира бошлайди ва ғазоликларни Синай ярим ороли билан чегарадош ҳудудга кўчириш уни келажакда Исроилга қарши ҳужумлар учун базага айлантиради.